पशुपति गिरी,कपिलवस्तु । नेपाल किसान ट्याक्टर समिति कपिलवस्तुले आफ्नो २७ औँ स्थापना दिवसको अवसरमा आयोजना गरेको रक्तदान कार्यक्रममा ७० प्वाइन्ट रगत संकलन भएको छ।

समितिको आफ्नै सभाहलमा आयोजना गरिएको कार्यक्रममा कपिलवस्तुका विभिन्न संघसंस्था तथा समितिका पदाधिकारी सहित ७० जनाले रक्तदान गरेका हुन्। नेपाल रेडक्रस सोसाइटी रक्तसञ्चार केन्द्र बुटवलको प्राविधिक सहयोगमा ‘रक्तदान, जीवनदान’ कार्यक्रम आयोजना गरिएको समितिले जनाएको छ।

समितिका सदस्य टंक पाण्डेको संयोजकत्व तथा बाणगंगा नगरपालिकाका नगर प्रमुख चक्रपाणी अर्यालको प्रमुख आतिथ्यतामा कार्यक्रम सम्पन्न भएको हो। कार्यक्रममा इलाका प्रहरी कार्यालय पिपराका प्रमुख प्रहरी निरीक्षक कालिका कार्की, बाणगंगा नगरपालिका–२ का वडा अध्यक्ष तथा नगर प्रवक्ता विष्णुप्रसाद पौडेललगायत विभिन्न संघसंस्थाका प्रतिनिधिको आतिथ्यता रहेको थियो।

कार्यक्रमलाई सम्बोधन गर्दै नगर प्रमुख चक्रपाणी अर्यालले नेपाल किसान ट्याक्टर समिति जस्ता संस्थाको सामाजिक सक्रियताले समाज रूपान्तरणमा महत्वपूर्ण भूमिका खेल्ने बताउनुभयो। उहाँले बाणगंगा नगरवासीले रगत आवश्यक पर्दा कहींकतै शुल्क बुझाउन नपर्ने बताउनुभयो।

कार्यक्रममा इलाका प्रहरी कार्यालय पिपराका प्रमुख कालिका कार्कीलाई स्वागत तथा सम्मानसहित परिचयात्मक कार्यक्रमसमेत गरिएको थियो।

समितिका अध्यक्ष झविन्द्र खनालले पछिल्लो समय अस्पतालहरूमा देखिएको रगत अभावलाई कम गर्न सहयोग पु¥याउने उद्देश्यले रक्तदान कार्यक्रम आयोजना गरिएको बताउनुभयो। उहाँले बढ्दो रगतको मागलाई पूरा गर्न यस्ता कार्यक्रमले सहयोग पुग्ने उल्लेख गर्नुभयो।

समितिले समय–समयमा रक्तदान कार्यक्रम आयोजना गर्दै आएको बताउँदै अध्यक्ष खनालले रगतको अभावमा कोही मानिसको ज्यान नजाओस् भन्ने हेतुले कार्यक्रम गरिएको हो,।

रक्तदान गर्ने सबैलाई कार्यक्रममा प्रमाणपत्रसमेत प्रदान गरिएको थियो। कार्यक्रमको सञ्चालन समितिका महासचिव विष्णु गिरीले गर्नुभएको थियो।