बाग्लुङ, २३ असार । अविरल वर्षाका कारण आएको पहिरोेले विद्युत् मुहानसँगै नहर बगाउँदा ढोरपाटन नगरपालिकामा विद्युत् सेवा अवरुद्ध भएको छ ।
शुक्रवार हिजो गएको पहिरोले मुहानसहित नहर बगाउँदा ढोरपाटन नगरपालिका–७ का स्थानीय अन्धकारमा बस्न बाध्य भएका हुन् ।
पहिरोले मुहानसहित करिब ३० मिटर नहर बगाएको ढोरपाटन नगरपालिकाका उपमेयर धनबहादुर कायत ९कल्याण० ले जानकारी दिनुभयो । विद्युत् सेवा अवरुद्ध हुँदा तीन सय घरधुरीका करिब एक हजार पाँच सय नागरिक विद्युत् सेवाबाट वञ्चित भएका उहाँको भनाइ छ।
विद्युत् तत्काल सञ्चालनमा ल्याउनका लागि काम भइरहेको कायतले बताउनुभयो । स्थानीयद्वारा जनश्रमदान भइरहेकाले केही समयमै विद्युत् सेवा सुरु हुने उहाँले बताउनुभयो ।
‘अहिले तत्काल पक्की पर्खाल लगाएर विद्युत् सञ्चालन गर्ने अवस्था छैन, जनश्रमदान गरी बर्खाभरिका लागि सञ्चालन गर्ने तयारी गरिरहेका छौँ,’ उपमेयर कायतले भन्नुभयो, ‘बर्खा रोकियो भने पक्की मुहान र नहर बनाउने योजना छ ।’ बर्खाको समयमा पटक–पटक बाढीपहिरोले दुःख दिँदै आएको उहाँले बताउनु भयो ।
