काठमाडौं ।

जल तथा मौसम विज्ञान विभाग अन्तर्गतको मौसम पूर्वानुमान महाशाखाले तिहार पर्वका लागि पहिलो विशेष मौसम बुलेटिन सार्वजनिक गरेको छ । महाशाखाका अनुसार यस वर्ष तिहारको अवधिमा कुनै उल्लेखनीय मौसमी प्रणाली सक्रिय नरहे पनि पश्चिमी वायुको सामान्य प्रभाव रहनेछ ।

यस प्रभावका कारण देशका पहाडी भूभागहरूमा आंशिकदेखि सामान्य बदली रहनेछ भने एक–दुई स्थानमा फाटफुट वर्षाको सम्भावना रहेको महाशाखाले जनाएको छ । उच्च हिमाली भेगका केही स्थानमा हल्का वर्षा वा हिमपातसमेत हुन सक्ने उल्लेख गरिएको छ ।

लक्ष्मीपूजा (कार्तिक ३)

लक्ष्मीपूजाको दिन देशका अधिकांश भागमा मौसम मुख्यतः सफा रहने अनुमान गरिएको छ । तर, कोशी, बागमती, गण्डकी र कर्णाली प्रदेशका पहाडी क्षेत्रमा भने आंशिक बदली र एक–दुई स्थानमा फाटफुट वर्षा हुन सक्छ ।

औँसी (कार्तिक ४)

औँसीका दिन पनि पहाडी क्षेत्रमा आंशिक बदली रहनेछ भने अन्य स्थानमा मौसम सफा रहनेछ ।

गोवर्धन पूजा (कार्तिक ५)

गोवर्धन पूजाका दिन पहाडी क्षेत्रमा आंशिकदेखि सामान्य बदली रहनेछ । साथै, कोशी र कर्णाली प्रदेशका उच्च पहाडी तथा हिमाली क्षेत्रमा हल्का वर्षा वा हिमपातको सम्भावना रहेको महाशाखाले जनाएको छ ।

भाइटीका (कार्तिक ६)

भाइटीकाको दिन देशका अधिकांश भूभागमा मौसम सामान्यतया सफा रहनेछ । तर, कोशी, मधेश लगायतका पहाडी क्षेत्रमा आंशिकदेखि सामान्य बदली रहने अनुमान छ । उच्च पहाडी तथा हिमाली भेगमा हल्का वर्षा वा हिमपात हुन सक्ने सम्भावना पनि बुलेटिनमा उल्लेख गरिएको छ ।

समग्रमा, महाशाखाले तिहारको अवधि सामान्य बदली र हल्का वर्षाको सम्भावनासहित मौसम अपेक्षाकृत मनमोहक रहने निष्कर्ष निकालेको छ ।