कपिलवस्तु क्षेत्र नं. १ मा रविन कार्कीको स्वतन्त्र उम्मेदवारी दर्ता

कपिलवस्तु । कपिलवस्तु निर्वाचन क्षेत्र नं. १ बाट प्रतिनिधिसभा सदस्यका लागि रविन कार्कीले स्वतन्त्र उम्मेदवारी दर्ता गराएका छन् । बाणगंगा नगरपालिका–२ पिपरा निवासी कार्कीले जेन–जी (Gen Z) युवाहरूको नेतृत्व गर्दै मंगलबार उम्मेदवारी दर्ता गराएका हुन् ।

उम्मेदवारी दर्तापछि सञ्चारकर्मीसँग कुरा गर्दै कार्कीले अब देशको नेतृत्व युवा पुस्ताले सम्हाल्नुपर्ने समय आएको बताएका छन् । उनले जेन–जी पुस्ता सचेत, सक्षम र परिवर्तनका लागि तयार रहेको उल्लेख गर्दै युवाहरूलाई मतदान प्रक्रियामा सक्रिय सहभागिता जनाउन आग्रह गरे ।

कार्कीले शिक्षा, रोजगारी, सुशासन र युवामैत्री नीति आफ्ना प्राथमिक एजेन्डा रहेको पनि बताए । स्वतन्त्र उम्मेदवारीमार्फत नयाँ सोच र जिम्मेवार नेतृत्व स्थापित गर्ने उद्देश्यका साथ मैदानमा उत्रिएको उनको भनाइ छ ।