बुद्धभूमि । कपिलवस्तुको बुद्धभूमि नगरपालिकाले हालैका दिनमा सामाजिक सञ्जालमार्फत नगरका जनप्रतिनिधिहरूले राजीनामा दिएको भन्ने समाचारबारे स्पष्ट प्रतिक्रिया दिएको छ । प्रमुख प्रशासकिय अधिकृत बासुदेव भट्टराईले मंगलबार सार्वजनिक गरेको विज्ञप्तिमा फेसबुक वा अन्य सामाजिक सञ्जालमार्फत दिइने राजीनामा कानुनीरूपमा वैध नहुने प्रष्ट पारिएको छ ।

“जनप्रतिनिधिहरूको पद रिक्त हुने व्यवस्था, राजीनामा दिने प्रक्रिया र पदाधिकारी सम्बन्धमा नेपालको संविधान तथा स्थानीय सरकार सञ्चालन ऐन, २०७४ मा स्पष्ट व्यवस्था भएको हुँदा सामाजिक सञ्जालमा दिइएको भनिएको राजीनामा वैधानिक मान्यता पाउँदैन,” विज्ञप्तिमा भनिएको छ ।

नगरपालिकाले यसबारे भ्रममा नपर्न सबै सरोकारवालालाई आग्रह गर्दै नियमितरूपमा नागरिकलाई दैनिक सेवा—सुविधा (सिफारिस, दर्ता लगायत) सुचारु रूपमा प्रवाह भइरहने जनाएको छ ।

यसअघि जेन-जी आन्दोलनका क्रममा नगरक्षेत्रमा केही जनप्रतिनिधिहरूले फेसबुकमार्फत राजीनामा दिएको जानकारी सार्वजनिक भएपछि स्थानीय स्तरमा बहस चलेको थियो । तर, नगरपालिकाले आधिकारिक प्रक्रियाबिना त्यस्ता राजीनामा अस्वीकार्य हुने स्पष्ट पार्दै नगरवासीलाई निश्चिन्त रहन आग्रह गरेको हो ।