काठमाडौं, भदौ १९ ।
नेकपा एमालेका महासचिव शंकर पोख्रेलले सामाजिक सञ्जाल बन्द गर्ने प्रक्रिया अघि बढ्ने संकेत गर्दै, यस्ता सञ्जालहरू खोल्न नदिइएसम्म समाजमा खल्बलिएका परम्पराहरू पुनर्स्थापित गर्ने प्रयास गर्न आह्वान गरेका छन् । उनका अनुसार, यसले समाजमा सुखद अनुभूति दिनेछ ।

सरकारले सूचीकरण प्रक्रियामा सहभागी नगरेका सामाजिक सञ्जालहरूलाई आजदेखि क्रमशः निष्क्रिय पार्ने निर्णय लिएको जनाएको छ । सञ्चार तथा सूचना प्रविधि मन्त्रालयका सूचना अधिकारी रवीन्द्रप्रसाद पौडेलका अनुसार, आजको बैठकमा निष्क्रिय गर्ने प्रक्रिया बारे निर्णय हुनेछ ।

सरकारले फेसबुक, युट्युब लगायतका प्रमुख सामाजिक सञ्जालहरूलाई ९ भदौदेखि एक साताको समय दिएको थियो । यो समय अवधि बुधबार मध्यरातिबाट समाप्त भएको छ । त्यसपछि मन्त्रालयले निष्क्रिय गर्ने निर्णय लिने बताएको छ ।

सोही सन्दर्भमा, पूर्व सञ्चारमन्त्री समेत रहेका एमाले महासचिव शंकर पोख्रेलले फेसबुकमा लेखेका छन्, “सामाजिक सञ्जाल बन्द भइ नखुल्दासम्म त्यसले खल्बलिएका असल सामाजिक परम्पराहरू पुनर्स्थापित गर्ने प्रयास गरौं। यसले सुखद अनुभव दिन सक्छ ।”